أول سنة جامعة؟ .. حياك

السلام عليكم... هذي موضوع مخصص حق الي توهم داششين الجامعة، حاب اعطيهم بعض النصايح الي ارجو منهم ان يطبقونها علشان دراستهم وعلشان حياتهم بشكل عام عقب ما يتخرجون، هذي الوقت بيمشي بتقزر الدراسة.. لكن في فرق بين ان يكون الواحد "خريج" وان يكون "خربوطة"، الفرق بينهم ان في واحد استغل وقته صح في الأشياء الي اتفيده.. فيوم تخرج صارت شخصيته قوية وثقته في نفسه عالية، وانسان قبل كل شيء قوي علمياً.

أولاً: الحضور على الوقت.

- في المدرسة بيصيح الجرس وبتدش الصف، بمعنى في احد يراقب لك الوقت.. لكن في الجامعة لازم اتراقب نفسك بنفسك، اذا المحاضرة تبتدي الساعة وحدة الظهر مثلاً.. فالمفترض (وبغض النظر عن السلوك العام) انك اتكون في السكشن قبل ذي الوقت، واتقيم روحك وتتقيد وتنضبط، اذا علمت روحك على هالنظام في الوقت بتنضبط باقي الأمور في حياتك بهالخصوص.

ثانياً: التواضع.

- والي يسلمك/ج، تعال الجامعة علشان تتعلم وتكسر نفسك واتهذبها، مو علشان اتراوينا انك احسن واحد في الدنيا، لا تيلس اتطالع الجامعة واتقيم كل شيء فيها من دكاترة وطلاب ومواد وتنسى نفسك.

ثالثاً: المكتبة.

- المكتبة مو مكان مسوينه علشان اتراجع فيه حق الامتحانات واتسوي  الاسايمنتات او اذا الدكتور طلب منك مرجع، او ترقد فيها بس... عود نفسك على سلوك انك اتروح المكتبة وتقره وتتثقف، كسلوك.. عود روحك في وقت البريك ان اتروح وتاخذ كتاب وتقره وتطلع.

رابعاً: الخطة.

- يفرق وايد بين طالب وطالب وجود خطة يحطها للدراسة.. واتكون هالخطة مناسبة لشخصية الطالب.. يعني مو الخطة "المثالية"، كل الي عليك ان اتسويه اهو تقييم ذاتي لشخصيتك.. واتسوي خطة دراسية ذاتية اتناسب شخصيتك وظروفك، المقياس بيكون في درجاتك.. قيّم درجاتك وعدل من نفسك.

خامساً: شغل ووناسة.

- في ناس في الجامعة بس اتحب تدرس وتدرس وتدرس، وفي ناس اتحب اتشارك في الفعاليات واتسوي الأنشطة حتى لو اثر على دراستها، حاول تجمع بين الاثنين وعط افضلية للدراسة.. الأنشطة بتقوي من مهاراتك وشخصيتك وبتخليك ذكي اجتماعياً الى حد ما، والدراسة اهي الهدف الأساسي من وجودك في الجامعة.. لا اتفرط في الأنشطة، بس قدّم الدراسة عليها.

سادساً: مافي شي بدون تعب.

- لا تتشكى وتتحلطم من التعب ومن الضغط.. خاصة انت/ي بو سنة ثالثة ورابعة الي المفروض تعودتوا على الضغط، اذا مضغوط عدل في خطتك الدراسية.. وعدّل في شخصيتك.. واترك عنك/ج التنهوص والتحلطم الي ما بيغيير شيء، مافي مشروع في الحياة بيصير بدون تعب.. مافي هدف عود في الحياة بيصير بمجهودات بسيطة.

سابعاً: الناس المشجعة.

- ابتعد عن الناس المثبطة للهمم.. ودور ناس اتشجعك، ولا تنسه اتشجع نفسك واتكافأها من وقت لي وقت علشان اتجدد نفسيتك.. احذر الناس الي تتحلطم بكثرة وماعندها لا شغلة ولا مشغلة الا الحجي.

هاي النقاط الي عندي، تقدر اتضيف انت وانتي نقاط نستفيد منها كلنا كطلاب جامعيين ناجحين على المستوى الدراسي والشخصي، علشان انكون "خريجين" مو "خربوطيين".. وعذراً على الاطالة.

محمد حسن يوسف