بليف

باغير اسلوب الكتابة ... وباكتفي بالزبدة ، وباخلي الكلام سوالف ..
مجموعة تجارب ساعدتني في برنامج بليف .. يمكن اتفيدكم في بليف او في حياتكم #خف_علينا ...

كنت طالب في انوفيشن 2009 ، وكنت مع ف سلمان في مجموعة وحدة ... اول تجربة اخوضها مع بنات خلط ، مع اني كنت باتخرج من الجامعة..بس تجاربي مع بنات الجامعة مو ذاك الزود ..

المهم ، عرفت من خلال 2009 نفسية البنات ، ومريت بمشاكل ... وحدة زعلت علي وعقب ما راضيتها يابت لي جبس (يزعم طاح الحطب) .. و وحدة زاحمت روحها بالشغل ، نبي انتعاون معاها بس ما عطتنا فرصة .. عقب قالت حق سلمان : اذا انا باسوي الشغل ابروحي طلعوا من البرنامج... جان يطنقر سلمان ويعطيها زففة محترمة 😠😠 وفجأة طلعت في يوم العرض وسوت لها عرض ابروحها .. وخذت من الافكار الي حططيناها ..
سنة 2010 ماقدرت ايود مجموعة لان دوامي كان شفتات ... والقطاع الخاص ما يتعاونون مع الي يبي يشتغل عمل تطوعي ..
الحمدلله .. المشاكل الي مريت فيها اول سنة ساعدتني اني اطبق الي تعلمته على الطلبة ، بس في 2011 الازمة ما ساعدتني وايد .. الطلبة متأثرين ، وانا احاول اساعدهم باللي تعلمته .. ما تأثرت وايد يوم سمعت ات في طلبة يبون ينسحبون ، كنت اعتقد انهم بس بحاجة انهم يسمعون بعض .. تدخلت في كل صغيرة وكبيرة ، حتى بروفات العرض الاخير تدخلت فيها ، حتى العرض الاخير ساهمت فيه .. بس علشان يطلع شغلهم حلو .. كنت وايد متحمس ، ما كنت مرن مع الطلبة ، #صيحت_وحدة ... لكن قدرت اقيم روحي عدل واطلع بأفكار يديدة حق السنة الي عقب ... فشلت في اشياء ، منها ال feedback ... كان لازم اتعامل بذكاء مع الطلبة ، مو مهم شنو باقول لهم .. الأهم اهو شلون اقول لهم واوصل لهم المعلومة. 

سنة 2012 .. كانوا الطلبة متنوعين في المواهب ، كانت فكرتي اني اطالع كل طالب ابروحه ... واخصص له يوم مراقبة ، وافكر فيه في الليل ... طبعاً الوقت الوحيد الي كنت افكر فيه في الطلبة قبل لا اغمظ عيني وانام  خخخ ، كنت اتعب ... كنت اعرف فيهم من الي يتحمل الغشمرة ، من الي مو عاجبه الموضوع، من الي يقول ان الفكرة سخيفة بس بدون لا يعبر عن هالشيء ، من الي يبي يقترح بس لأن مححد يسمعه فيسكت ، كل تحركاتهم وكلامهم كنت ارصده حتى لو كان في زحمة الشغل ... بس حلو الشعور ، لين الطالب يوثق فيك كفاسلتيتر ، يتصرف في القروب براحة تامة  لأنك موجود كمشرف وعارف شيصير ...

فازوا ... بس انا بعد لازم اقيم افكاري ، واعدل اغلاطي ، واغير من اسلوبي ... لأن تعبت ، مو لازم ايلس على راس الطلبة واقيم كل شيء صغير والا عود فيهم كأني امهم .. اكتشفت ان في طلبة ما تطلع قدراتهم كلها ... بسبب قدرات عالية في طلبة ثانيين ، شاركت في مخيمات كرئيس مجموعة خمس مرات ... فزت بأحسن مجموعة ثلاث مرات .. مرة تعبت لدرجة اني ماقدرت افرش مرقدي في الخيمة الا بمساعدة الطلبة لان ظهري طق علي ، اعرف شنو اسوي علشان الفريق يفوز ،  لكن بعدين ...وفازوا يعني ، سو وات ؟؟ وصارحت ف الوزان بالموضوع، اني قاعد اشتغل على الطلبة علشان يفوزون ... وهالشيء غلط ولازم اغيره ، وهذي فايدة التقييم الدقيق..يعطيك فرصة انك تتجدد واتعدل من روحك وماتحس بالملل...

ركزت في 2013 ، ان الخصال الي يبونها الطلبة ان يغيرونها في نفسهم تتغير فعلا ... وحاولت ادفع الطلبة واعطيهم فرص و اوفر لهم بيئة زينة  كل واحد حسب الخصلة الي يبي يغيرها ، لكن هالشيء صار على حساب النتيجة النهائية لأني ما ركزت عليها ، وقتها استوعبت ... ان الطلبة في هالسن ماديين شوي  لازم بيفكرون في الفوز .. وانهم يصيرون الاول ، هالشيء اذا ما صار بينكسرون ، ومو شيء بسيط مثل ما كنت اتصوره قبل ..

هالسنة ، ركزت على النتيجة .. في نفس الوقت ابي الطالب يكتشف قدراته الحقيقية ، بدون ما اتدخل في قراراته ... واخليه اهو يتحمل مسؤولية افكاره ويحاسب روحه ، ركزت هالسنة اني ماقعد على راسهم وايد ... وهالشيء زاد من ارتباطهم ببعض و وجهتهم ان اي مشكلة اتحلونها بينكم..بعدين ترجعون لي ، وهالشيء خلاهم يثقون في بعض ، في نفس الوقت مجموعات ثانية قدرت افيدها  واتعرف على الطلبة كلهم ،  وهالشيء خلاني افيد اكثر الطلبة ، واستمتع بكل البرنامج ، حسيت ان كل فريق اهو فريقي ... وانا مشرف على كل الفرق ، صراحةً للحين ماقعدت اجوف سلبياتي وايجابياتي هالسنة ... بس هاي ملخص سريع ...

#قيموا روحكم على حسب الظروف ، و حاولوا اتجددون من اسلوبكم وتتعلمون اشياء يديدة 😊😊

#اذا قدرت اتطلع خصلة دقيقة في الطالب ... بيوثق فيك وايد ، وبتلاحظ ان كل ما بيشتغل بيحط عينه عليك .لأنك قدرت تفهمه 😉

#لا اتقول حق مجموعتك كلام عاطفي واايد .. شوي بس ، ولا اتزف وايد ، لأن عقب ما اتزف ما بتحس ان عندك وايد اشيه تستعملها...تناقش معاهم اكثر ، طلع منهم الحلول ، ولا تفرض عليهم شيء .. رأيك مو مهم في كل مرة 😄

#ال feedback ... نقطة تحول في المجموعة ، اذا تعاملت معاه بذكاء .. خلك دقيق في طرحك مع الطالب ، ولا يطلع من عندك وهو مو مقتنع او مو عارف شيسوي.😵

#لا تنسه .. لا تنسه .. لا تنسه ، انك اتقيم روحك 😤