سبحانه ... قدر ولطف

اليوم باغير شوي الطريقة ، باكتب البلوق بالعامية .. وانتوا قيموا اذا كان هلون احسن او بالفصحى احسن  ... ههههه .

امس طحت طيحة في الجسرة ... ما كانت طيحة قوية لكن وضع يدي اليمين كان حده غلط ، كانت وايد مفرودة على جدام .. يالله ،قدر الله وما شاء فعل ، صادتني من قبل اصابات اقوى .. مرة طلع من برطمي دم .. ومرة طققة يات في ويهي .. ومرة في بطني .. وكنت دايما اقنع روحي اني اقدر اقوم في نفس الوقت ، وفعلا هالشيء كان يصير ... بس امس ، كنت اظن اني اقدر اقوم .. بس يوم تحسست مكان يدي اليمين وجفتها مو في مكانها خفت .. بس الحمدلله ، هالخوف خلاني اسوي شيء زين .. اني اطلب الاسعاف وما خليت احد غير الاسعاف يلمسني ، لأن اعرف ان هالنوع من الاصابات .. غلطة وحدة ممكن اتكلفني وايد ، وانا مابي الموضوع يطول واهلي يخافون خصوصا امي .

يه الاسعاف .. وسألني : ظهرك يعورك ؟! قلت له :لا .. قال:عيل انقلب .. قلت له :مابي ههههه لين حسيت انهم ما يقدرون يشيلوني الا اذا انقلبت .. انقلبت بصعوبة ؟،وصرخت صرخة من الالم ..ماذكر اني صرخت مثلها في حياتي .. حتى يوم انكسر صبع ريلي ما صرخت هالصرخة ، في السيارة .. ضربني بنج ، يدي اليمين نمملت ، سألته اي مستشفى قال لي بنروح السلمانية .. يوم نزلنا من السيارة حاولت اعرف اي مبنى احنا ؟! .. تميت اطالع البيبان لأن عليها ستيكرات بيض وفيها الكود ( شغلي القديم علشان جذي اعرف هالمعلومة) .. تميت لي الاشعة منبطح ، تالي مارتحت .. عدلت روحي وقعدت ،ابي اجوف "الواتساب" واطمن الناس ... كنت عبالي بس فريق "سما" الي يدرون ... الا عقب،اجوف محمد الوزان من اليابان مطرش لي مسج ..فاطمة فؤاد، راشد المضاحكة،يوسف بومطيع،طلاب "بليف" كلهم يدرون ويسألون ويبون يتطمنون علي .. تأثرت من هالشيء ، انا ما كنت اظن ان عندي ربع وايد ،بس يوم جفت هالقد ناس تسأل عني طمنتهم وقلت لهم ان عمار معاي .. بس ماقدرت اخش دمعتي #بو_دمعة ، هاي من نعم الله علي ولله الحمد .. ان الله سخر لي ناس يساعدوني وقت ضعفي .

يوم ياو الدكاترة حق يرجعون يدي مكانها  .. يقول لي واحد :انبطح ، قلت له :لا اتيودني..بانبطح شوي شوي ،انا مو دليع بس صج يدي اتعورني .. يوم انبطحت ،غطييييت في سباااااااات عمييييق ..ولا ادري بهم شلون رجعوا يدي ، وهاي بعد من نعم الله علي .. قمت من النوم الا عمار يقول لي:بس خلاص.. قلت له:شلون بس خلاص .؟! قال اي بس بيخلصون اجازتك واحنا ماشيين .. هههه الموقف غريب شوي ، بس اهم شي اني ابي اطلع من هالمكان بسرعة .. تخيلوا ، ناس مرقدة في الممر .. جننه قاعدين في ملجأ ، حده مأساة الوضع .. زين حصلت لي مكان ارقد فيه .

رجعت البيت ، امي وابوي ناطريني .. ويدي مربوطة ، ههههه وقعدت اشرح الموضوع .. وتشعبت وايد ، تحجيت عن سما والفعاليات الي اشتركوا فيها ومن اهما ومن متى صاروا .. كله من سؤال امي:شموديك اهناك ؟! بس احسن .. اتجوفني امي ويدي مربوطة احسن من اتجوفني راقد على سرير المستشفى ، سبحان الله .. قدر ولطف .

اليوم ، نزلت علي قائمة الممنوعات .. لا اتسوق سيارة،لا تلعب كورة،لا اتشيل شيء ثقيل،لا ولا ولا ولا ... انا ما انظر حق هالشيء ان حريتي تقيدت ، لأن وضي يتحتم علي اني التزم شوي في بعض القيود لين اصير احسن ..ولأن الامور اصلا كانت ممكن اتكون اسوء لا ما حطيت يدي .. ممكن راسي يصير فيه شيء او ويهي .. الحمدلله على كل حال ،واليد اليسرى ما شالله وايد متعاونة مع المتعورة اليمنى .. تاكل عنها،اتشيل عنها،تكتب البلوقات اكثر شيء عنها ... الحمدلله قايمة بالدور .

اشكر كل من وقف معاي في ضعفي .. "لقد كنتم في النائبات كثير" ، مابي اقول لكم اردها لكم في الافراح .. بس ابي اقول لكم ان شالله اتجوفون جزه عملكم في الآخرة مضاعف مرات ومرات .

باكتب اسمي باليد اليسار.. تستاهل الواحد يشكرها ههههه ويشكر الله على النعمة

محمد حسن يوسف